ملقيتش عنوان أحطه فعلا غير ده
كل اللى حسيته انى عايزة أدخل أكتب ملقيتش مكان تانى أهرب ليه غير هنا
صعب أوى انك متلحقش تفرح ، متلحقش تتغير ، متلحقش تفوق بتلاقى دايما عصاية كل ما تقوم تخبط فيها توقعك تانى
و الأصعب انك تلاقى أحلامك بتتحطم و تسسحب من قدام عينيك واحد ورا التانى
و مش بس أحلامك انت كمان أحلام اللى حواليك فيك بتلاقى نفسك بتقضى عليها
ليه معرفش ؟؟!!
كان نفسى أجاوب على السؤال قبل ما أسأله
كان نفسى أكمل الى عاهدت عليه نفسى امبارح بس فعلا مش قادرة
بقيت حاسة ان الدنيا حطانى بين حيطانها و بتضغط عليا من غير أى اشفاق أو رحمة
ليه برضه معرفش ؟؟!!
بقيت بحس ان أنا اللى غلط ما هو مش ممكن كل ده وأنا اللى صح فى الاخر
هو فى ايه برضه معرفش ؟؟!!
يارب أنا مبقولش غيرها و مش هقول غيرها و مليش غيرها
أنا فعلا مبقيتش قادرة أستحمل
.
.
.
1 comments:
ياااااااااه على الحالة دى عارفة بتحتاج بجد هروب لمكان جديد ويفضل تكونى لوحدك تركزى وتسترجعى كل أفكارك غيرى كل حياتك او على الأقل اللى تقدرى عليه وفكرى فى أحلامك انها امل انتى عايشه من اجله حتى لو حسيتى انها بتتسحب منك لازم تتمسكى بيها لاخر لحظة لسبب بسيط اوى انك كدا كدا عايشة يبقى ليه متحاوليش ببقى
فكرى واعملى لنفسك مرحلة انتقالية تنطلقى من خلالها لحياة جديدة كلها ثبات
تقبلى مرورى لاول مرة بمدونتك
وتقبلى تحياتى واتمنى التواصل بالمدونات
Post a Comment