الحيـــاة

كل يوم يمر علينا ونحن نبحر بسفينة الحياة نمر على محطات نقف عند أحدها ونتغاضى عن الأخرى

نبحر حاملين أحلام الطفولة البريئة وطاقة الشباب الجريئة وعقول الشيوخ الناضجة أملين أن نصل بسفينتنا الى بر المستقبل الواعد

فى طريقنا تداعبنا أحيانا نسمات هادئة تصيبنا بالحيوية والنشاط والانسجام مع ضوء الصباح المشرق
وتلطمنا أحيانا رياح الليل العاتية فى ظلامه الدامس مع أنغام حزينة تطل على مسامعنا

أمواج البحر العاتية أحيانا والرقيقة أحيانا أخرى

شمس النهار الحارقة أحيانا والدافئة أحيانا أخرى

برد الليل القارس أحيانا والناعم أحيانا أخرى

نعم .. انها الحياة
يوم حزن ويوم فرح
يوم نجاح ويوم فشل
يوم ضحك ويوم بكاء


ونحن نسير بسفينتنا فى بحر الحياة نمر على حلوه ومره نعيشه ولا ندرى متى ستقف السفينة وعلى أى بر

سترسو بنا لننزل منها الى حلمنا الأعظم

"جنة الخلد"

انها فقط سفينة تبحر كل منا يملكها ويعلم أنها ستقف فى لحظة هو لا يعلم متى وأين ستكون !

الأهم من كل هذا أن نتيقن أن الرحلة حلوة ومرة يوم ويوم فلنفرح بلحظاتها الجميلة ونحزن على لحظاتها الشقية

بلا افراط ولا تفريط
:) 

كيف تقلل ساعات نومك ؟

فى البداية لازم نقول ان المستحيل هو مستحيل لأنه مفيش مستحيل :) 

كثير مننا بيتخيل انه ميقدرش ينام قليل وانه متعود ينام 10 ساعات ولا 6 ساعات وميقدرش ينام أقل من كده ! 

فى الحقيقة كمان بيقنع نفسه ان الانسان لازم ينام من 8 : 6 ساعات علشان يبقى صحيا كويس وهو ده عدد الساعات الطبيعي في حين ان الرسول - صلى الله عليه وسلم - مكنش بينام أكثر من 4 ساعات كان ساعات كمان بينام أقل من كده وده معناه ان وجهة النظر دى غلط !! 

 العقل هو مجرد أداة كل واحد فينا بيمرنها زى ما هو عاوز على الحاجة اللى هو عاوزها .. يعنى فى واحد ممرن عقله على انه بياكل مربى ومبيحبش العسل فبيوهم نفسه انه مستحيل ياكل عسل مع انه فى الحقيقة لو عوّد نفسه على أكل العسل بعد كده هيحبه ! 

وده بالظبط اللى بيحصل فى النوم ... مثلا انت متعوّد تنام 8 ساعات يوميا لو نمت أقل من كده تقوم مصدع ومش قادر وبيبقى يوم معكنن والشغل واقف ومش مركز 

وده فعلا صحيح لكن للأسف انت لما بتلاقى نفسك كده تانى يوم بتقول الحل انك تنام ال 8 ساعات !! 

الحقيقة باه ان الحل انك تحل المشكلة مش انك تهرب منها 

عاوز تتعود على انك تقلل عدد ساعات نومك بتجربة عملية حقيقية واقعية جرّب النقط العملية دى : 

1. النوم مبكرا يعنى أقصى حاجة الساعة 11 بالليل واياك من نوم الصبح اللى بيكون بعد الفجر تسهر تسهر وتروح تنام بعد الفجر أكبر غلطة تعملها انك تضيع وقت الفجر لأنه فعلا بركة وهو الى فيه سحر اليوم كله 
2. كل أسبوع هنقلل ساعة من ساعات نومنا لو بننام من 11 : 5 الأسبوع اللى بعده ننام من 11 :4 وهكذا لغاية ما توصل لهدفك اللى انت حاطه لنفسك بعدد الساعات اللى تحبها 
3. هتعانى جدا جدا خلال الفترة الأولى وهتحس بعدم الانتاجية وانك مش مركز بس اثبت وجاهد لأنك بتعود عقلك على عادة جديدة عليه فلازم الفترة الانتقالية دى تحصل متعملش زى اللى بيعمل ريجيم ويسيبه من أول أسبوع :) 
4. الاستيقاظ قبل الفجر بنصف ساعة أو ساعة لصلاة القيام ودى أول حاجة بتخرجك من مود النوم لأن الوضوء ويليه الصلاة بحركاتها بتضخ فى العقل والجسم حركة نشاط عالية جدا وده كان بحث علمى وأنا لما جربت فعلا لقيت ده صحيح ! سبحان الله ! 
5. صلي الفجر واقرأ ورد القرآن لغاية الشروق مثلا وقول الأذكار فى البلكونة وانت فى جو منعش جداااا وبعدها مباشرة العب رياضة لمدة نصف ساعة على الأقل .. اى رياضة حتى لو جرى فى المكان وبالشكل اللى تحبه 
6. جهز فطار صحي فيه مكونات غذائية متكاملة لأن اهم وجبة فى اليوم هى الافطار .. (فول - جبنة - بيض - مربى أو عسل ) وبعدين اشرب مشروبك سواء نسكافيه أو شاى أو قهوة أو لبن أو متشربش :)
7. توكل على الله وابدأ شغلك وصدقنى مش هتندم 

ملحوظة: لو معندكش اصرار مش هتحقق حاجة لأن فعلا الموضوع صعب فى الأول لكن زى ما قلت المستحيل مستحيل ! 

جربوا ومش هتندموا وابقوا ادعولى :))

فراغ مليان !!

المفروض انى ملقيتش وقت أتغذى فيه واكلت وانا واقفة ولقيت نفسي بدخلهنا وبكتب 

غريبة فعلا بس ساعات بنعمل حاجات محتاجينها حتى لو الدنيا كلها فوق راسنا 

!!!

دخلت علشان أكتب حاجة قليلة فى عدد سطورها لكن كبيرة أوى جوايا 

هو أنا غلطت ولا مغلطتش 

هو انا غلط ولا صح أصلا 

هو انا غريبة مريبة بعمل حاجات مستفزة تزعل 

ولا انا كده طبيعتى كده لا مستفزة ولا حاجة

بس انا بجد اتخنقت ان حتى أقرب الناس ليا مش قادر يستوعبني 

أنا شخصيتى كده 

حاولت أغيرها وأتصنع وألبس ماسك تانى لكن حسيت انى انسانة عجيبة بالنسبة لنفسي 

أنا كده 

اشمعنى أنا بتقبل الناس على شخصياتهم وانا ببقى بغلي من جوايا فى حاجات منهم لكن بسكت ومبزعلش لنى بتقبلها وخلاص 

ليه يعنى محدش بيعمل معايا كده 

ياااااااااارب 

الحمد لله انى مش لاقية وقت أفكر فيه حتى فى الموضوع ده 

الحمد لله ان الدنيا مكركبة فوق راسي ومش لاقية وقت أبص فيه لحاجة 

الحمد لله ان ورايا مليون حاجة من أماكن مختلفة ملهاش علاقة ببعض علشان أفضل أشتغل لغاية ما ألاقي نفسي نايمة من كتر التعب فمعرفش أفكر كالعادة وانا نايمة 

الحمد لله 

بتقدر المقادير وبتكتب كل حاجة فى وقتها 

يارب اهديني وأعنى و اجعل ليا القبول وفهمني وارزقني قلبا لا يبقى به ذرة من غضب أو خصام مع من احب 

بدون عنوان ...

أول مرة أحس اني مش حاسة بحاجة 

داخلة ومش عارفة أنا هكتب ايه مع اني كل مرة ببقى حاسة باللى انا عاوزة أقوله بس المرة دى مش حاسة بأي حاجة 

الحاجة الوحيدة اللى حاسة بيها هي احساسي بالموت 

احساسي بالخوف 

احساسي ان الغطاء اللى كان فوقي اتكشف والجو برد أوى 

وأنا مش قادرة أمسك الغطاء تانى وأغطي نفسي بيه 

أنا عارفة اني غلطت 

مش بس غلطت ده انا أهنت نفسي قبل ما أهين أي حد 

احساس بشع لما تحس من جواك ان انت مش انت 

وأنا دلوقتى حاسة ان أنا مش أنا 

كنت بتعامل كأني في غيبوبة 

لسه لغاية دلوقتي مش فاهمة ازاي انا بقيت مش أنا 

ازاى وصلت لدرجة اني أجرح حد أيا كان هو مين 

ولما أجرح ولأول مرة فى حياتي أجرح حد هو مش أى حد 

أنا مش فاهمة أنا زعلانة ليه 

هو كان فى حد ضربني على ايدي قبل ما أعمل كده !

هو كان فى حد أجبرني ! ولا أنا اللى بتلكك وعاوزة أبرأ نفسي وخلاص !

بس أنا والله مش بتلكك 

أنا معرفش أنا عملت كده ازاي 

معرفش والله معرفش 

زي اللى شارب حاجة ومش حاسس هو بيعمل ايه 

بس والله العظيم أنا مش كده

والله والله أنا مش كده 

أنا عمري ما زعلت حد ولا عمري فى يوم جرحت حد ولا في لحظة فكرت انى أضايق حد

معرفش ايه اللى حصل 

والله ما اعرف ايه اللى حصل 

يمكن اكون فى كابوس 

يارب يكون كابوس وأصحى منه باه 

أصل هو لو حقيقة يبقى احساسي انى بموت صح 

بس أنا حاسة انه كابوس 

ايوه كابوس وخلاص هصحى منه أهه 

خلاص هصحى

خلاص 

خلاص 

كل حاجة حلوة انتهت فى لحظة ازاى 

يارب أنا غبية ومذنبة بس انت قادر انك تعفو عني وقادر انك تخلي الانسان اللي جرحته يعفو عني 

يارب أنا مش عاوزاه بس يسامحني 

انا عاوزاه يعفو عني 

ينسى ان فى حاجة حصلت 

يكون هو فى كابوس ويفوق منه وينساه باه

أى حاجة بس يعفو عني 

يارب أنا مش هقدر أعيش كده

مش هعرف أتعامل وأنا حاسة بكده

مش عارفة بجد ايه اللى حصل وايه اللى هيحصل 

أنا مخنوقة ومش عارفة أعيش 

بجد مخنوقة ومش عارفة أعيش 

مش عارفة أنام 

مش عارفة أشتغل 

مش عارفة أخلي دماغي تبطل ولو ثواني تفكير 

يارب بجد أنا تعبانة أوي

أنا مجروحة أوى من جوه وكل ثانية بتعدي الجرح بيزيد ويتعمق جوايا 

 اكبر جرح اتجرحته في حياتي لغاية دلوقتي يوم ما جرحت حد هو مش أي حد

مستحيل يبقى زي أي حد حتى لو فى أى مكان وبأي شكل وبأى ماسك هو برضه مش زي أي حد

أنا خايفة أموت قبل ما يعفو عني 

خايفة يحصللي حاجة قبل ما يسامحني حتى

خايفة أسيب الدنيا قبل ما الجرح والنزيف يقف

أنا بس عاوزة أعر ف أعمل ايه 

عاوزة أعرف أوقف النزيف ازاى 

يارب عاقبني بأى حاجة بس خليه يعفو عني ، خليه ينسى اللي حصل 

أنا عارفة انك قادر و بايديك مفاتيح كل القلوب 

يارب ارحمني من العذاب اللي جوايا 

يااااااااااااااااااااارب 

الدنيا الحقيقية ...

عندما يقابل الانسان فى حياته اناسا أشكالا وألوان ثم فجاة يبدا فى اكتشاف حقيقة هؤلاء الأشخاص واحدا تلو الاخر ...

عندها تظهر معادن الناس الحقيقية

عندها يظهر الذهب

عندها تلمع نجوما فى حياتنا لا نستطيع الحياة بدونهم ولا أن نتنفس فى هذه الحياة بدون أنفاسهم

عندها تنقطع كل السبل الا السبل التي توصل اليهم

هؤلاء .. أناس يثرون حياتنا وبدونهم تكون الحياة مستحيلة

ان هذه الدنيا لا تكون أبدا محلا للعيش بدونهم وبدون أنفاسهم الرقيقة وأرواحهم الجميلة التي تحوم حولنا وترقرق قطرات لطيفة كقطرات الندى تجعل حر الحياة وشدتها نسمات رقيقة تطوف حول أجسادنا

هؤلاء .. هم من يعطون بلا حدود ، يعطون ولا ينتظرون المقابل ، يعطون ولا يهمهم كلمة شكر

لا يهمهم قال فلان أو ذهب فلان ، كل ما يهمهم هو ادخال الابتسامة والسرور على قلوب من حولهم بعطف وحنان ورقة وجمال وحب وعطاء

هم قليل فى حياتنا ولكن لهم الكثير فى قلوبنا وأرواحنا

أشهد الله انى احبهم فيه وكل لحظة فى عمري سأجعلها فى خدمة كل منهم حسب مكانته ومنزلته

منهم من ساكون له خادمة طول عمرى

ومنهم من ساكون له بارة طول حياتي

ومنهم من ساكون له كما يحب وكيف يحب وأين يحب

اللهم احفظهم بعينك

ولا تحرمنى منهم فى هذه الدنيا

فان أنفاسي تتعلق بوجودهم فى هذه الحياة الى جانبي أكتافهم بكتفي وأيديهم بيدي وحياتهم هى حياتي

نعم ; هذه هي الدنيا الحقيقية

الدنيا التي تمتلئ باناس أمثالهم وان قلوا

:)

Smile please :)

لماذا الكآبة ؟

لماذا التجهم ؟ 

أيوجد ما فى هذه الدنيا يمكن أن نتجهم بسببه !!

سحر القلوب الذي علمنا اياه ديننا 

الابتســــــــامة 

تذوب الجليد 

وتقرب المسافات 

وتقرع الأبواب بل انها تدخل من أوسعها 

تنفرج بها الأسارير 

وتتداوى بها الجراح 

وتهون بها الصعاب والعقبات 

مازلنا نسير فى هذه الدنيا تمر امامنا الحداث الكثيرة 

محزنة .. متعبة .. كئيبة .. مليئة بالهموم 

ولكن ;

ألم ننظر حولنا فى هذا الكون الرائع 

لم لا ننظر الى السماء بزرقتها وصفائها فنبتسم 

لم لا ننظر الى النجوم بلمعانها ونورها فنبتسم 

لم لا ننظر الى الشمس بأشعتها ودفئها فنبتسم 

لم لا ننظر الى البحار بعمقها ونعمها فنبتسم 

لم لا ننظر الى القمر فنراه يكبر يوما عن يوم فنبتسم 

لم لا ننظر الا لما يهمنا ويحزننا 

!! 

فلنجرب ونحاول للحظة أن نرى الدنيا بعيون مشرقة ، عيون مليئة بالرضا والطمأنينية 

تعلم أنه لن يصيبها الا ما كتب الله لها 

تعلم أنها لن تنال منها الا ما قدر الله لها 

تعلم أنها لن تعيش يوما أكثر من عمرها ولن تموت يوما قبل أجلها 

أيتها النفوس الحزينة 

أيتها الوجوه المتجهمة 

أيتها العيون الدامعة 

انفضي عن نفسك غشاوة حزن اصطنعتيه بيديك 

انظري من حولك الى آلاء ربك فى كونه

لا تتردى لحظة فى طلب العون 

واعلمى أن تبسمك هو صدقة ومشكاة لمن حولك تضيئين بها ما سكن قرون فى الظلام 

تبسموا 

وتفائلوا 

فانها سويعات قليلة ونقابل ملك الملوك 

رحمن السماوات والأرض ورحيمهما 

ثم بعدها سوف تتبسمون للأبد فى جنة خلد عند مليك مقتدر

فى صحبة خير البشر أجمعبن 

انها دعوة للإبتسامة 

فتبسموا 

:)

:)

:)

آثرت أن أبدأ بهذه الابتسامة الخفيفة فى تلك اللحظة التي تعود فيها الفتاة الصغيرة بداخلى لتسطر كلمات بسيطة تعبر عما يدور باعماق تلك الفتاة
انها اللحظة التي تعشقها بكل كيانها
لحظة غابت عنها كثيرا ولكنها لم تغب عن قلبها واداركها
ان لم أكن أمسك بقلمى لكتب فى تلك الفترة لم يكن الا لأنى لم أستطع ذلك !
نعم ، عجزت فتاتي عن الامساك بقلمها والكتابة فغاب عنها وعيها وغاب عنها ادراكها وأيقنت أن الحياة محالة بدون نبراسها : قلمها - ورقتها

أحلام تتسطر من وحى الخيال لتصبح واقعا ملموسا

منذ أكثر من عام وأنا أكتب حلمي الأكبر والآن وأنا أكتب أراه واقعا أمام عيناي
واقعا عشت لأجله وصليت ودعوت ربي له كثيرا والآن تحقق اختيار ربي لي وليس ما أريده من داخلي


انها أحلامي
تتحقق واحدة تلو الأخرى
ومع ذلك لم أكن قادرة على الامساك بقلمي


يالعجبي لهذا الإنسان .. ماذا يريد أكثر من أن تتحقق له أمانيه واحدة تلو الأخرى !
ماذا يريد أكثر من تلك النعمة التي تلى النعمة وهو لا ينظر الا الى الكوب الفارغ من حياته !


ان لم تستمتع أيها الانسان بكل لحظة من حياتك فمتى ستستمتع
حياتنا مليئة بالتحديات والمصاعب التى تواجهنا كل يوم وكل ساعة .. ولكن العاقل منا من يبتسم

ابتسم تبتسم لك الحياة
قابل تحدياتها وصعابها بابتسامة وحيوية طلقة لا تضع لها حدودا

هذا ما تعلمته الآن
اطلقى يا فتاتى العنان لخيالك وحلقى فى سماء الحب والأمل
ازرعي زهرة فى كل بستان من بساتين الدنيا تحصدي ابتسامة تملأ الدنيا حبا وأملا
رفرفي بجناحيك وسط الحقول الخضراء مع العصافير الملونة حول الزهور والأشجار النضرة
أعيدى لقلبك الحياة .. أعيدى لدنياك الابتسامة .. أعيدى ليديك روحها ( قلمها ) ..
سطرى واكتبى كل لحظة من حياتك
فما فات قد مات ولو من لحظة واحدة والقادم هو ما تبحثين عنه
جمــــال الدنيا فى يديك فلا تتخلي عنه ولا تتخلي عن حلمك مهما كان


هناك من ينتظر تلك الابتسامة فلا تبخلي بها ولا تفكرى فيما يضيعها

واجهي
تحدي
اعملي
وابتسمي
فالمستقبل اعلم أنه أفضل بهذه الابتسامة وهذا الحلم الرائع


:)